玻璃曲奇

今次主力係做玻璃曲奇，貪佢晶盈的顏色，睇到就令我諗起教堂入面的玻璃，好靚!

其實” 玻璃”係Fox's果汁糖，原理好簡單，就係焗印模曲奇時，預留空心位置，約7成熟時就把糖放入空心位置利用熱力焗溶果汁糖，就成為好似有張玻璃紙在中間的玻璃曲奇了。印模曲奇的食譜網上多不勝數，口味因人而異，有人喜歡多butter，有人喜歡脆，真係要試下味先知自己心水。所以都係主力講講塊” 玻璃”的做法啦!

做玻璃曲奇注意事項:

1. 焗爐不能太高溫，放糖的時間要慢慢測試。因為糖太遲放會溶不了或餅乾焗太久太黑，太早放的話，糖會煮沸出泡泡，影響賣相, 甚至會焗焦，一般來說，以多士焗爐來說，因為爐的空間不大，時間較難控制，曲奇上色至少許金黃的時間就差不多了。

2. 糖的份量當然要視乎曲奇預留的空心位置而定，太少會填不滿中間部份，太多又會滲到餅乾底部，不夠鬆脆。而且, 糖太厚，雖然”色水”較深，但亦會影響口感，舉例一個2cm x 2cm 的空心位置，想要薄薄的效果就用半粒果汁糖可以了。

3. 果汁糖只需連糖紙用水果刀即可切開備用，不用大力打碎，否則彈到周圍係，甜甜的糖係會吸引昆蟲的。

4. 出爐後記得完全放涼，等糖變硬乾身後才可取出曲奇，如果唔係，你手上只有空心曲奇乙片了!

特別溫馨提示給用多士焗爐焗製玻璃曲奇的朋友:

用多士焗爐焗製玻璃曲奇的話，建議大家不要一次做太多的份量，因為每次可焗的片數不多，要分多次焗製，而途中又要keep住睇火，為免焗爐受損，盡可能焗製2小時內能完成的份量為佳 (其實莫講話個爐, 幾個鐘淨係坐係度睇火，人都會痴痴地線) e.g. 每次焗曲奇約10-15分鐘 (連溶果汁糖及出爐入爐共20分鐘)，10litre 多士焗爐每次焗5-8片不同形狀的曲奇的話，大概焗30片已經要用上一個下午了，當然，也可以分幾次分幾日焗啦!! 大家加油!! 有成品可以和3妹分享呀!!

鬆馳熊糖霜曲奇

可愛嗎?
實不相瞞, 這個不是多士焗爐做出來的，但係我好肯定多士焗爐一定勝任有餘
3個人玩左5個鐘,整左100pcs,
唔難,但煩,但又好有滿足感.
100pcs 好快冇晒, 個個話好味,
不過成日食曲奇太肥仔了,
下次做埋輕怡版先

這個可售的，
全HANDMADE (包括糖霜，非現成糖霜筆)
有order 的話我會再做，
每塊$8，20塊起，詳情可留言，THX

蜜糖黑芝麻戚風

戚風總係有種魔力，鬆鬆軟軟的口感，唔太甜的味道，仲有彈手的手感都帶黎好大的滿足感。
懶左個幾月，3 妹終於再度出場喇！
講返個toaster, 因為爐內空間細，令蛋糕同焗頂發熱線太近，比較容易燶面，所以千萬唔可以貪心，加上蛋漿受熱會膨脹起來，所以如果焗爐太小，寧願分2 個焗呀！
材料: 蛋黃3個
蛋白4個 
砂糖90g (分成30g 及60g)橄欖油50ml 烘培蜜糖2 茶匙
低筋麵粉60g泡打粉1/2茶匙
黑芝麻粉20g
準備：低筋麵粉+泡打粉先過篩，將30g 砂糖加入蛋黃

做法：
1. 將加左30g 砂糖的蛋黃輕輕打至糖溶化，慢慢加入橄欖油，黑芝麻粉& 烘培蜜糖，略打至均勻
2. 加埋已過篩的低筋麵粉和泡打粉，略打至冇粉粒
3. 打蛋白至企身(可以在打蛋器上起彎角),一邊打一邊加入60g 砂糖
4. 用fold in 法，將2 兜蛋輕手攪，令2 者合而為一， 150 度焗30 分鐘

在麵包食譜加入湯種

上次講開，自家製包包因為冇用化學調味/趨化劑，一般都唔可以要求天然的材料完全做到好似出街買果d咁軟熟，

所以加入唔同的"種"就可以增加口感，特別係好似3妹咁又冇麵包機，淨係用個多士焗爐焗麵包的，就更加要努力啦~

其實無論做咩麵包，我地都可以加入唔同的"種"去幫助發酵，亦可以早在一兩天之前就準備定個種，咁時間上就可以再方便d。

只要明白下面3條問題，就會有基本概念了~

1.        咁到底湯種入面有咩呢 ?

就係1份高筋粉& 5份水加熱就ok。係咪好easy呢…

即係話: 如果用100g 的高筋粉 就加500ml 水

離火後大約重460-480g 左右的湯種啦，夠用多次的了

如不是經常做麵包唔洗做咁多啦，因個人需要就是

2.        咁到底湯種要加熱至什麼程度呢 ?

有d書話65-70度，但3妹連大少少的焗爐都唔去買，又點會無情情去買個溫度計丫，

參考好多網上的資料，用手動打旦器一邊攪拌一邊用中火加熱，

開始的時候會係好稀的粉水，

一路攪，攪到變成糊狀，

直至個糊仔跟住個打旦器有軌跡，

表面唔會自己平滑返就大約係65度時的表現喇

中種? 湯種? 老麵? 直接法??

做麵包的食譜好多時都會見到中種、湯種、老麵等的製作方法，初初睇的時候都會R晒頭…

要深入了解都唔難，網上資料要睇可以睇到你睇唔晒，不過簡單黎講，就係在食譜入面加入唔同方法已處理(甚至已發酵)的食材，令佢鬆軟d發酵發好d，當然製作時間亦都會隨之而增加，,所以直接法相對就比較方便。

自家製包包因為冇用化學調味/趨化劑，一般都唔可以要求完全做到好似出街買果d咁軟熟，所以加入唔同的"種"就可以增加口感了~~ 至於口味就因人而異，近年好多人趨向用湯種，取其快。

標題中的4種方法三妹都試過，個人而言覺得中種的發酵味最濃；湯種的製作較快；老麵就較適合經常製作麵包的朋友，但效果不算明顯；而直接法就係最簡單但係麵包就相對冇咁軟熟啦~

如果都包本身餡料較重味道/多 (如上次的心型的蜜糖腸加芝士)，直接法是可以的，因為口感一般都被餡料搶了風頭，取個平衡，但如果要製作方包又或者豬仔包等以麵包平身為主角的話就不太建議了，愈簡單的麵包愈需要工夫呢!!

讓我開始接觸自家制麵包的明報專欄

市面麵包常見添加劑

明報 – 2011年9月24日星期六上午5:26

【明報專訊】工業生產的麵包常含有多種添加劑，主要的作用，不外乎幾個﹕縮短製作的時間，優化麵包的質感、賣相，以及延長麵包的貨架時間。以下是其中一些需要留意的添加劑。預先包裝的麵包，可以在包裝袋上的標籤查看所用的材料。但新鮮的麵包，就不會有標籤。

防腐劑

延長麵包壽命

近日有兩間連鎖麵包店的話事人，因為麵包的包裝袋問題舌戰。一間解釋因為運送過程需要保證衛生，所以麵包一定要獨立包裝，另一個則說麵包都在店中做的，沒有運送過程，故不需要有獨立包裝。其實除了極不環保外，獨立包裝還帶來另外一個問題。新鮮烘焗出來的麵包需要頗長的時間冷卻。還熱的麵包放入袋內，便會有水蒸氣將袋弄濕，麵包很容易發霉。故用膠袋包裝的，為了要防霉防菌，一般都會加入防霉劑，而最常用的是丙酸鹽（propionate），如丙酸鈉（添加劑281）或丙酸鈣（添加劑282）。這些化學物質的主要用途在於防菌、防霉的滋生，增加麵包的貨架時間。丙酸鹽類防腐劑已被證實能導致兒童的過度活躍行為，包括容易急躁、不能專注、睡眠質素差等（Dengate:2002ci）。至於有自設工場的麵包店當然也可能會用這些防腐劑，但因為沒有標籤，消費者是沒有方法得知的。筆者有一個想法，就是如果麵包店可以提供這些資料，對消費者會是一個很大的方便！

麵包改良劑（bread improver）

優化口感

通常用在工業生產的麵包，目的是縮短製作的時間、優化口感。所有能對麵包的質感、味道等有改良作用的天然或化學物均可稱作麵包改良劑。最原始的做法是將一小部分的麵團預先發酵大約24小時，令酵母產生一些天然的物質，如酶、氣體等，便已是很好的改良劑了。但在製造麵包的過程，要存放大量麵團是一個問題，製作時間那麼長又是另一問題。故大部分都會用改良劑幫一把。不同改良劑的成分可以有很大的分別。其中一些還是很有問題的。例如溴酸鉀（potassium bromate），一直是改良劑成分中的化學物質之一，近年被發現是致癌的。因為這個原因，很多國家，如歐洲各國、亞洲包括中國等都禁用，但在美國，還是被廣泛使用的。麵包改良劑能增加麵包的韌度、體積和麵包製造過程的穩定度。一些麵包放進口中便會「黏埋一嚿」，便是加入過量改良劑的結果。自家做的麵包不加改良劑，是不會有這種效果的！

反式脂肪

增心血管病風險

烘焙的食品，如蛋糕和中式甜包等都會用上比較多的脂肪。家裏做麵包，通常會用牛油或橄欖油等。但麵包商因為各種原因（如成本），都會選擇氫化了的脂肪。植物油如大豆油、芥花籽油等的成本比較便宜，但可惜都有一個問題，便是含有大量容易氧化的多元非飽和脂肪，很容易因氧化而油膉。油商會將這些油氫化，變成半固體狀。這些油正好可以在食譜中代替牛油。但近年，科學界有大量數據指出這些油對健康的害處，包括大大增加心血管病的風險。現時已包裝食品中必須列明反式脂肪的含量。但新鮮麵包就不會有這些資料。

麵粉漂白劑 慳時間

剛磨好的麥粉是不能用來製造麵包的，因為蛋白質的結構問題，會發酵發得不好，麵團體積不夠大，而且很難定形。這些麵粉需要經過一個「成熟期」，由空氣中的氧氣將其中的蛋白質氧化。這個自然發生的過程，需要數個星期，而且並不容易掌握。時間加上技術問題，大多數工業製的麵包用的麵粉都是經過化學物質漂白的。用的包括過氧苯甲、二氧化氯等。氧化程序還能將麵包中的天然黃色的胡蘿蔔素氧化，故有漂白的效果。

色素 鮮色得嚇人

本來麵包是很少會加入色素的。但近年在超市中找到一些黃黚黚的饅頭，實在嚇人（一個笑話就是關了燈都一定還看得見）。用的色素是日落黃（添加劑110），是會引致兒童過度活躍的（McCann:2007kf）。

添加劑有多種多樣，有可吃也有不可吃，詳情可登入www.goodfoodwatch.com參詳

參考資料•Dengate, S., & Ruben, A. (2002). Controlled trial of cumulative behavioural effects of a common bread preservative*. Journal of paediatrics and child health, 38(4), 373-376.

•McCann, D., Barrett, A., Cooper, A., Crumpler, D., Dalen, L., Grimshaw, K., Kitchin, E., et al. (2007). Food additives and hyperactive behaviour in 3-year-old and 8/9-year-old children in the community: a randomised, double-blinded, placebo-controlled trial. The Lancet, 370(9598), 1560-1567.

註﹕筆者與麵包機製造商或其代理沒有任何商業上的關係。

HEA 底

呢2日冇整野食，放工去街街HEA 底

POST 返之前整的一張相啦

阿美帶埋我d花生醬包包去左野餐! (食譜後上 J)

試味報告: 蜜糖腸芝士心心包

蜜糖腸芝士心心包 放過夜之後…..

白老鼠1號 - 老公: 唔叮有d硬，叮左10sec 之後ok

白老鼠2號 - 豬囉: 味道幾好，叮左10sec，冇問題，加花生醬應該會好好味，雖則老公唔食沙律醬，下次可以試下加，因為我都硬係覺得會好食d

白老鼠3號 - 三妹: 好重奶味，如果唔飲開奶應該覺得好"so"，可能係因為完全冇叮(頂，一返到公司就好忙，咖啡都冇杯飲清水咋…陰公)

以多士焗爐做烘焙前的心理準備

以多士焗爐做烘焙前，我們都應有心理準備，接受它的的小小不足，很多時跟大焗爐有以下的不同:

1.      它個子小，為我們省了很多地方，但因容量有限，很多時都要分2次甚至3次焗製。(唔知好定唔好，三妹比較怕一下子食同一樣野太多次，一般都只會做一爐少少的份量，做多了反而不喜歡 :P )

2.      它價錢平，三四百蚊有交易，唔知自己係咪有興趣、又或者冇時間一年整得兩三次都唔會太肉赤，但比起大焗爐，火力當然冇咁均勻，如果情況嚴重，就要每一段小時間將食物轉一轉位 (好彩，三妹的焗爐此情況不嚴重)

3.      它構造簡單，唔會有太多用不著的function，不過，如果有選擇，就買可以分開上火下火的 (即上下發熱線可分開控制開關的)，如有冇，都不要緊，用多張鍚紙隔開都ok。(至於三妹的焗爐，可以選上下火一齊/ only上火，但係冇淨下火架!)

所以，多士焗爐也很可愛的呀，識得善用，其實好好用。有時，比起大焗爐一推入爐等夠鐘仲更加有滿足感添!

直接法蜜糖腸芝士心心包(機搓)

本身都係睇日本WEBSITE 多，今次睇一本台灣書，叫「烘焙新手必備的第2本書」試下做直接法的麵包，本身想做一半份量，等我個多士焗爐可以一take過，點知不過我就失手計錯左份量，點知唔覺意改一改，都OK 喎，仲多左個3妹食譜添~~  (不過就要分2爐@@)
唔洗Tranlate 正呀!

食譜 (8個, 約9cmx9cm@)

高筋麵粉 200g
低筋麵粉 50g
乾酵母 半茶匙
雞蛋 半隻 (約30g)(剩餘留下焗之前塗包面用)
砂糖 30g
鹽 一小撤
奶 100ml
無鹽牛油 15g
蜜糖腸2條
芝士1-2片

簡易做法:
1. 以上材料除左無鹽牛油之外(用筷子)攪拌至完全融合，因此食譜水份較多，所以會好似好濕咁

2. 加入已預先室溫放軟的無鹽牛油分2次加入，先用中速打約3-5分鐘，再轉高速攪至杰身 (p.s.書寫攪至不黏手, 但因更改左奶的份量，所以攪極都黏，我攪左大約15分鐘) (試下拉開粉團睇下可唔可以拉到好薄，得就即係OK啦)

3.發酵: 將粉團放入打蛋盆，包保鮮紙，放入蒸鑊(只需小水泡不用大滾)熄火焗約45分鐘，總之就係有2倍半咁大

4. 按走粉團入的空氣，將粉團分成8份，搓圓及灑上少許水花，讓小粉團(同自己，呵呵) 休息15分鐘

5. 15分鐘後，粉團已經比先前軟身，就可以搓成長條，將頭尾向中間對摺成心心的形狀，塗上蛋汁，中間加上已切粒的蜜糖腸&芝士

6. 多士焗爐預熱至120度，先熄火將已造型的麵包灑上少許水花入爐離火焗15分鐘，粉團明顯發大及鬆弛之後開火120度焗15-20分鐘，ok!

ABOUT RECIPE

因為我一般係睇日文網站 (扮勁的)
所以我冇中文RECIPE
好希望有一日呢度會真係有人同我開心SHARE
等我有動力UPLOAD 食譜

中種紅荳餐包

都係用左中種, 入面包的是吉吉島12蚊紅荳蓉，包面忘記了搽蛋漿呀~~ >_< 分2次焗, 一共9粒~

中種迷你腸仔包

多士焗爐其實做麵包係冇難度的,
 問題係想唔想做, 有冇興趣, 同埋多唔多人等你開飯
我通常會做迷你包, 一次焗4-5個, 冇話唔得, 少量生產慢慢享受過程,
2公婆帶無添加愛心麵包返工做早餐

開blog 的念頭

又怕阻地方又怕玩耐，我只有一個1100W的10L多士焗爐，即使買個大的，整多了其實我兩口子又食唔晒，於是我就努力善用它，用下用下，曲奇、小蛋糕、麵包...只要份量計得岩，一樣都OK!
不過可能玩烘焙的都不會滿足於一個toaster，網上的高手雲集，多數Recipe都要求齊全設備，用於多士焗爐的就比較少，於是乎，我就自己計食譜百分比開始baking...小量生產愈玩愈好玩!!
玩下玩下又post 下相上facebook，最後想到開blog，唔知最後可唔可以同多d人一齊分享，至少我可以有一個平台，為我的toaster 爭返口氣!! hehe~